பா-வெளி

தன்னிலை உணர்தல்

2010-08-07T08:17:00.000-07:00

• பிச்சையெடுக்கிறது...மரம் சுமக்கிறது

வித்தை காட்டுகிறது

மண்டியிடுகிறது...ஆசீர்வதிக்கிறது

பழக்க பலதும் செய்கிறது

• சிறு சங்கிலியில் பிணைக்கப்படுகிறது

தார்க்குச்சியால் குத்தப்படுகிறது

அளவுச்சாப்பாடு உருட்டித்தின்கிறது

• தன்னிலை உணர்ந்து ஓர்நாள்

விட்டு விடுதலை ஆகிறது

அடிமைப்படுத்தியவன் சொல்கிறான்,

"அதற்குப் மனநிலை பிறண்டு விட்டது"

-ஜெ.நம்பிராஜன்

'மெக்காலே' மொழி

2010-06-13T07:37:00.000-07:00

பூச்சாண்டி என்றால் என்னவென்றே

தெரிவதில்லை...'மெக்காலே' குழந்தைகளுக்கு

காட்சில்லாவையும் டைனோசரையும்

துணைக்கு அழைக்க வேண்டியிருக்கிறது

சோறு ஊட்ட

-ஜெ.நம்பிராஜன்

பிள்ளைத்தமிழ்

2010-06-06T09:38:00.000-07:00

படிக்கும் புத்தகத்தை
பறித்துக்கொண்டு ஓடுகிறாய்
புத்தகத்தை மறந்து விட்டு உன்னைப்
படிக்கிறேன்...நான்

மாறாத மழலைப்பாடல்களை
மறந்து மறந்து பாடுகிறாய்
மறக்காமல் மீண்டு வருகிறது
எனது பால்யம்
-ஜெ.நம்பிராஜன்

இழவு நாடு

2009-02-08T05:54:00.000-08:00

எல்லா வீடுகளையும்

போன்றுவிடிவதில்லை

இழவு வீட்டின் இரவு
தூங்கா விழிகளுடன்
இழப்பின் வலியுடன் கூடிய
விடியாத இரவு அது
பிரிந்த நண்பர்களையும்
பேசாத சொந்தங்களையும்
அழைத்து வந்து விடுகிறது
மிக எளிதாய்...ஒரு மரணம்
எல்லோரும் சேர்ந்து
வழியனுப்புவர் கண்ணீருடன்
இறந்தவரை
இவையெல்லாம் வழக்கமான மரியாதை
மரிப்பவருக்கு...
ஆனால்
வழியனுப்ப எவருமில்லை
அழும் உறவுகள் எல்லாம்
அகதிகளாய் எங்கோ
பதுங்கு குழிகளுக்குள்
பதுங்கியிருக்கிறது
ஒரு தேசம்
பாஸ்பரஸ் குண்டுகளுக்கு
அஞ்சி
நித்தம் நூறு சடலங்கள்
மொத்தமாய்...கொத்துக் கொத்தாய்
சாவின் குறைந்தபட்ச
மரியாதையும் அற்று
மனிதம் மறந்த மரங்களாய்
ரத்தத்தின் மிச்சங்கள்
வேடிக்கை பார்க்கும்
அண்டை நாட்டில் அமைதியாய்
-ஜெ.நம்பிராஜன்

முத்தத்தின் நிறைகுடம் - துளி 2

2008-09-20T23:58:00.000-07:00

உன் ஒவ்வொரு முத்தமும்
விருட்சத்தின் விதை
என்னுள் விழுந்து வளர்ந்து
ஆயிரம் முத்தங்களாய்ப் பூக்கிறது

உன் உதடுகளுக்கு மத்தியில்
இறுக்கப்பட்டிருக்கிறது
என் உயிர் மூச்சு
உன் முத்தத்தால்
எனக்கு உயிர் கொடு

காற்று வெளியில்

எனக்கான முத்தங்கள் மிதக்கின்றன

உன் இதழ்களில் உயிர் பெற்று

என் இதழ்களில் இடம் பெற

என் ஒவ்வொரு கவிதையும்

உன் முத்தத்தில் தொடங்கி

முத்தத்திலேயே முடிகிறது

இந்த பூமியின்

முதல் முத்தம்

யார் கொடுத்தது

ஆதாமா...ஏவாளா?
-ஜெ.நம்பிராஜன்

ஊர் கூடி...

2008-08-17T07:08:00.000-07:00

அங்கொன்றும் இங்கொன்றுமாய்

உறுப்புக்கள் சிதறிக் கிடக்க

கேட்பார் எவருமின்றி

கடற்கரையோரம்

அனாதைப் பிணமாய்

பிள்ளையார்...

விநாயகர் சதுர்த்தி

கொண்டாட்டங்களுக்குப் பிறகு

-ஜெ.நம்பிராஜன்

வாய்ப்பு

2008-08-17T06:49:00.000-07:00

தயாராகி விட்டார்கள்

சிறுவர்கள் பிச்சையெடுப்பதற்கும்

இளைஞர்கள் வசூல் வேட்டைக்கும்

அரசியல்வாதிகள் சர்ச்சைகளுக்கும்...

விநாயகர் சதுர்த்தி நெருங்குகிறது

-ஜெ.நம்பிராஜன்

நெல்லை எக்ஸ்பிரஸ்

2008-07-13T03:06:00.000-07:00

ஆற்றுக்குளியலுடன் ஆசையாய்
அனுபவித்தாயிற்று பார்த்துப்பார்த்து
தொழில்நகரத்தில் கிடைக்காதவற்றை
ஊர்வாசத்தின் மிச்சமாய்
பயணப்பட்டன சில பூச்செடிகள்
இரயிலில் என்னுடன்
எல்லாவற்றையும் பிரிக்கையில்
இலவச இணைப்பாக வெளிப்பட்டது
செடிகளுக்கு நடுவே ஊர்ந்தபடி
இரயில் பூச்சி ஒன்று
பார்த்தறியாத பக்கத்து வீட்டு
குழந்தைகளிடம் காட்ட வேண்டும்
அதுவரைக்குமாவது உயிரோடிருக்க வேண்டும்
அந்த பூச்சி

-ஜெ.நம்பிராஜன்

முத்தத்தின் நிறைகுடம் - துளி 1

2008-07-12T03:22:00.000-07:00

எனது முதல் கவிதைத்தொகுப்பு 'முத்தத்தின் நிறைகுடம்' நூலிலிருந்து கவிதைகள் தொடராக பாவெளியில் வெளிவரும். முதல் பகுதி இங்கே...

உன் மேல் உதடு சூரியன்...
கீழ் உதடு சந்திரன்
ஒரே முத்தத்தில்
உருக வைக்கும் வெயிலையும்
உறைய வைக்கும் பனியையும்
என் மேல் செலுத்துகிறாய்.
நீ விவசாயி
நான் விளைநிலம்
என்னுள் மோகத்தை விதைத்து
முத்தத்தை அறுவடை செய்கிறாய்.
உன் ஒவ்வொரு முத்தமும்
ஓர் முள்
அதை...
மறு முத்தத்தால் தான்
எடுக்க வேண்டும்.
உன் இதழ் தேனடை
அதில் தேனெடுக்கும் போது மட்டுமே
தேனீக்கள் கொட்டுவதில்லை.
எத்தனை முறை குடித்தாலும்
தீராத மதுப்புட்டி
உன் இதழ்
எவ்வளவு குடித்தாலும்
ஆசை அடங்காத பெருங்குடிகாரன்
நான்.

முத்தத்தின் நிறைகுடம்

ஜெ.நம்பிராஜன்

வெளியீடு: ஜெயஸ்ரீ பதிப்பகம்

நாளை...?

2008-06-15T03:58:00.000-07:00

ஒவ்வொரு நாளும் கண்விழிக்கையில்
முந்தைய நாளின் கனத்த நினைவுகள்
இமைகளின் மேலே அமர்ந்து கொள்கின்றன

சன்னல் திரையை விலக்கினால்
முகத்திலடிக்கும் சூரிய ஒளியில்...
பொட்டல் வெளியும் ஒற்றைப் பனையும்

எதிரில் தென்படும் மனிதர்களின்
முகங்களிலும் வெறுமை
மண்டிக் கிடக்கிறது

தூரத்து வானத்தைப் பார்த்தபடி
நேரத்தை ஓட்டுவது எப்படி?
இரவு எப்போது வரும்

இரவினில் இமையை மூடாமற்தடுக்கும்
சிந்தனைத் தூசொன்று...
நாளையையும் இவ்வாறே நகர்த்தியாக வேண்டும்
-ஜெ.நம்பிராஜன்
சமர்ப்பணம்:
சிதைந்த வாழ்வுடனும் சிதிலமடைந்த இல்லங்களிலும் வசிக்கும் ஈழத்தோழர்களுக்கு... இக்கவிதை

மொட்டை உறக்கங்கள்

2008-06-09T05:00:00.000-07:00

ரீங்காரமிடும் மின்விசிறியின்
தாலாட்டுடன் உறங்குவது சுகமே
ஆனாலும் மொட்டை மாடியை
மனம் மறப்பதில்லை

வானத்துக்கும் பூமிக்குமிடையே
மனிதன் எழுப்பிய சுவரைத்
தகர்த்தது போன்றதொரு மகிழ்வு

உறக்கம் வராத பொழுதுகளில்
நட்சத்திரங்களுக்குள் ஓடி விளையாடலாம்
நிலவில் நிழலாய் இருப்பது
பாட்டியா, முயலா அல்லது
பாலூட்டும் அன்னையாயென ஆராயலாம்

மொட்டை மாடி உறக்கம்
கனவுகளும் கவிதைகளும் நிறைந்தது
மின்விசிறி உறக்கத்தில்
நாளையைப் பற்றிய கணக்குகளிலேயே
கனவுகள் கலைந்து விடுகின்றன

என் செய்வது?
அடுக்ககங்களுக்குள் அடைந்து விட்ட
என் இப்போதைய உறக்கங்கள் யாவும்
மொட்டை மாடியற்ற
மொட்டை உறக்கங்களாகி விட்டன
-ஜெ.நம்பிராஜன்

குட்டிப் பிசாசு

2008-05-30T00:14:00.000-07:00

எல்லாப் பறவைகளையும் 'கா..கா' என்றும்

எல்லா விலங்குகளையும் 'தோ..தோ' என்றும்

எளிமைப்படுத்தி நீ அழைக்கையில்

குழந்தையாய் மாறி நிற்கிறது

சங்கத்தமிழ்.

'...க்கம்' என்று நீ

கை கூப்பி வணங்குகையில்

வணக்கத்திற்கே 'வணக்கம்' போட்டதுபோல்

பெருமை கொள்கிறது.

எப்போது நினைத்தாலும்

சிரிப்பாய் வருகிறது

சிவன் கோவில் நந்தியை

'..ம்பா' என்று நீ விளித்ததும்

'சாமியை அப்படி சொல்லப்படாது'

என்றபடி வந்த அய்யரின்

குடுமியை இழுத்ததும்.

உன்னைக் கொஞ்சும் பெண்கள்

'அப்படியே அப்பா மாதிரி'

என்கிற போது

உன்னைக் காட்டிலும்

வெட்கம் நேரிடுகிறது

எனக்கு.

-ஜெ.நம்பிராஜன்

அனிமல் பிளானெட்

2008-04-22T09:04:00.000-07:00

தொலைக்காட்சிகளில் இப்போதெல்லாம்
மனிதர்களைப் பார்க்க முடிவதில்லை
மான்களும் மயில்களும் மட்டுமே

கணவன் வேறொருவரின் மனைவியுடன்
நடனமாட
மனைவி வேறொருத்தியின் கணவனுடன்
சரசமாட
மெய்மறந்த நேயர்கள் சொல்கிறார்கள்
"கெமிஸ்ட்ரி நல்லாயிருக்கு"

முப்பது வயது மங்கையுடன்
முகத்தில் மீசை முளைக்காத சிறுவன்
விரச நடனமாட
அவிழ்ந்து விழும் வகையில்
ஆடை அணிந்த
நடுவர் நடிகை சொல்கிறாள்
"மச்சான்...ஐ லவ் யூ டா"

-ஜெ.நம்பிராஜன்

காரண 'காரியம்'

2008-04-14T05:10:00.000-07:00

"பிழைப்பு"

"காலத்தின் கட்டாயம்"

"வேறு வழியில்லை"

"நான் மட்டுமா..."

"உலக நியதி"

ஏதாவதொரு காரணம்

வைத்திருக்கவே செய்கிறார்கள்

தங்களை நியாயப்படுத்த

எல்லாத் துரோகிகளும்

-ஜெ.நம்பிராஜன்

பொங்கி வருகுது வியாபாரக் காவிரி

2008-04-07T04:13:00.000-07:00

உலகத் தொலைக்காட்சிகளில்

முதல் முறையாக

தமிழ்த் திரையுலகினரின்

மாபெரும் போராட்டம்

நேரடி ஒளிபரப்பு

இந்நிகழ்ச்சியை வழங்குவோர்

"மைசூர் சேண்டல் சோப்"

அதே நிறுவனத்தின்

கன்னட அலைவரிசையில்...

நம்ம கன்னட மக்களுகாகி

நம்ம கன்னட நட்சத்திரகளு

மகா ஓராட்டா

இ காரிகிரமமு நிமக்கே கொடவரு

"சென்னை மூவர்ஸ் & பேக்கர்ஸ்"

-ஜெ.நம்பிராஜன்

மொழிபெயர்ப்பு:

ஓராட்டா - போராட்டம்

இ காரிகிரமமு -இந்நிகழ்ச்சி

நிமக்கே- உங்களுக்கு

கொடவரு - வழங்குபவர்

பிள்ளைத்தமிழ்

2008-03-08T00:55:00.000-08:00

அழைக்கும் வேலைக்காரியிடம்

தாவும் குழந்தை

பார்ப்பதில்லை

சாதியும் பணமும்

தண்ணீரில் விளையாட சம்மதம்

குளிக்கச் சம்மதமில்லை

எங்கள் வீட்டு பாப்பாவுக்கு

ஒழுங்கற்றே இருந்தாலும்

அழகாய்த் தெரிகிறது

குழந்தை இருக்கும் வீடு

-ஜெ.நம்பிராஜன்

காலம்

2008-02-23T04:06:00.000-08:00

காலத்தைத் துரத்தித் தோல்வியுறுவதே

காலத்தின் கட்டாயம் போலும்

எது எப்படி இருப்பினும்

காலம் காலம் தாழ்த்தாது

தன் கடமையைச் செய்து விடுகிறது

காலத்தைக் கைப்பற்றுவதை விட

காலத்துடன் பயணிப்பதே எளிதாயிருக்கிறது

இருப்பினும்...

இழந்த நாட்களின் வலியிலும்

நிகழும் நாட்களின் பயத்திலும்

வரும் நாட்களின் கனவிலுமே

காலம் பெரும்பாலும் கழிந்து விடுகிறது

-ஜெ.நம்பிராஜன்

தப்பு

2008-02-23T03:45:00.000-08:00

தப்பாமல் அவ்வப்போது

தப்புகள் செய்திருக்கிறேன் நான்

சிறு வயதில் செய்த தப்புகள்

சிரிக்க வைக்கும்

இப்போது நினைத்தாலும்

அப்போது செய்த தப்புகள்

வேடிக்கையாக செய்தவை

வேண்டுமென்றே பல தப்புகள்

இப்போதும் செய்கிறேன்

தப்புத்தப்பாக தப்பு செய்து

அகப்பட்ட தருணங்களும் உண்டு

அப்போதெல்லாம்

தப்பு செய்யக் கூடாது

என்று தோன்றியதே இல்லை

தப்புத் தப்பாக

தப்பு செய்யக்கூடாது

என்று மட்டுமே தோன்றியது

-ஜெ.நம்பிராஜன்

முத்தம்

2008-02-07T03:56:00.001-08:00

குழந்தையின் உதடுகளில்

எறும்பு கடித்தது போன்ற

பழுத்த உதடுகள் உனக்கு

இதழ் குவித்துப் பேசுகையில்

இதழ்களின் பாதைகளில்

பயணப்படும் என் மனது

இதழ்களின் இடைவெளியில்

இறுக்கப் பட்டிருந்தது

என் உயிர் மூச்சு

இன்னும் கனத்துக் கிடக்கிறது

நெஞ்சில்...

விட்டுப் பிரிகையில்

வெகு கவனமாக

எச்சில் படாமல்

நீ கொடுத்த

அந்த சம்பிரதாய முத்தம்

-ஜெ.நம்பிராஜன்

குழந்தைப்பாட்டு

2008-02-07T03:29:00.000-08:00

முயற்சி

சிணுங்குகிறது

கை கால்களை ஆட்டுகிறது

பிறகு அழுகிறது

எதுவும் நடவாத போது

தொட்டிலில் இருந்து

தானே இறங்குகிறது

குழந்தை

கண்ணாமூச்சி

முழுவதும் மறையாமல்

கொஞ்சம் தெரியும்படி

ஒளிய வேண்டியிருக்கிறது

குழந்தைகளுடன்

கண்ணாமூச்சி விளையாடுகையில்

-ஜெ.நம்பிராஜன்

ஊடலுக்குப் பின்...

2008-01-24T05:22:00.000-08:00

அழுது கொண்டிருந்தாய் நீ

அமர்ந்திருந்தேன் நான்

கொஞ்சகொஞ்சமாய்

கண்ணீரோடு 'நீ' வழிந்தோட

கண்ணீரில் 'நான்' கரைந்தோட

என்னைத் தொலைத்த நான்

உன்னை மறந்த நீ என

நாமானோம் நாம்.

-ஜெ.நம்பிராஜன்

அறியாத வயது

2008-01-09T03:49:00.000-08:00

பள்ளி செல்லும் வழியில்

பழுதடைந்து நின்றது பேருந்து

வயல்வெளிச் சாலையில்

இறங்கி நின்ற மழலைகள்

பள்ளியை மறந்து பரவசமாயினர்

குயில்களின் கூவலோடு சேர்ந்தது

குழந்தைகள் குரல்

குழந்தைப் பருவம் தொலைத்த

நடுத்தர வயது ஆசிரியை

எரிச்சலோடு சொன்னாள்

"டோண்ட் டாக்".

-ஜெ.நம்பிராஜன்

ஹேப்பி நியூ இயர்

2008-01-04T05:27:00.000-08:00

நள்ளிரவு கேளிக்கைகள்

மதுவிற்க்கு இலவச இணைப்பாக

சிற்றின்பத் தீண்டல்கள்

மிதக்கிறது...நம் பண்பாடு

நட்சத்திர விடுதி

நீச்சல் குளத்தில்

பிணமாக.

-ஜெ.நம்பிராஜன்

சுயரூபம்

2007-12-27T05:10:00.000-08:00

எல்கேஜி சிறுவனின் ஏபிசிடி கிறுக்கல்கள்

வட்டத் தலையுடன் குச்சிக் கால்களுடன்

வண்ண வண்ண பொம்மைகள்

குளிக்கப் போகுமுன் எடுத்து ஒட்டிய

ஸ்டிக்கர் பொட்டுகள் சில

கணக்கு தெரியாத பால்காரியின்

கரிக்கோடுகள் ஆங்காங்கே

எண்ணெய் தேய்த்த பின் கையைத் தேய்த்த

அடையாளங்கள் சில

இவையனைத்தையும் தாண்டி எட்டிப் பார்க்கிறது

நான்கு ஆண்டுகளுக்கு முன் அடித்த

பச்சை டிஸ்டம்பரின் வண்ணம்

வெளி வார்த்தைகளால் பூட்டி வைத்தாலும்

வெளிப்பட்டு விடும் என்...

சுயரூபத்தைப் போலவே.

-ஜெ.நம்பிராஜன்

நிழலின் அருமை

2007-12-15T03:21:00.000-08:00

ஆட்டு மயிர் வாடையுடன் வந்த

அழுக்குச் சட்டைச்சிறுவன்

மேசையைக் கழுவிய தண்ணீரில் சிறிதே

மேலேயும் தெறிக்கிறான்

தண்ணீர் தருபவன்

தன் விரல் அழுக்கையும்

சேர்த்துத் தருகிறான்

ஆர்டர் செய்து

அரை மணி கழித்து வரும்

இட்லியோ அரைவேக்காடு

அன்பளிப்பை வாங்க மறுத்த

சிப்பந்தி சொல்கிறான்,

"ஒரு ரூபாய்க்கு

ஒரு சிகரெட் கூட கிடைக்காது"

மனைவியின் அருமை

ஓட்டலில் புரியும்

-ஜெ.நம்பிராஜன்

எது வெற்றி

2007-11-30T04:20:00.000-08:00

கடைசி ஓவர்களைத் தவறாமல் பார்த்து விட

அலுவலகத்திலிருந்து அவசரப் பயணம்

சிக்னலில் ஒருபுறம்

கைக்குழந்தையுடன் பிச்சைக்காரி

மறுபுறம்

வசூல் வேட்டையில் சாலைக்காவலர்

இடதுபுறம் போகலாமென்றால்

மூத்திர வாடை அடிக்கும் முட்டுச்சந்துகளில்

டாஸ்மாக்கர்களின் சுகமான தூக்கம்

வலதுபுறமோ

தண்ணீர்க் குடங்களின் அணிவகுப்பு

நேர்ச்சாலையில்

குழிகளில் தடுக்கி விழாமல் வீடு சேர்ந்தால்

தங்கக்கோப்பை பரிசு நிச்சயம்

தட்டுத்தடுமாறி வீடு சேர்ந்ததும்

கதவு திறந்த மனைவி சொன்னாள்

"இந்தியா வின்"

-ஜெ.நம்பிராஜன்

சென்னபட்டணம்

2007-11-27T04:40:00.000-08:00

வாழ வரும் அனைவரையும்

வாரி அணைக்கிறது சென்னை

நல்ல சம்பளக்காரனுக்கு

அப்பார்ட்மண்டில் வீடு

குறைந்த சம்பளக்காரனுக்கு

ஒண்டுக் குடித்தன வீடு

வேலை தேடுபவனுக்குக் கூட

மேன்சனில் குடித்தனம்

சிக்னல் அருகே வசிக்கிறான்

சென்னைத் தமிழன் மட்டும்

-ஜெ.நம்பிராஜன்

நந்திகிராமம்

2007-11-20T03:10:00.000-08:00

செய்தி
'பரபரப்பான சூழ்நிலையில்

பாராளுமன்ற கூட்டத்தொடர்'

'சட்டசபையில் எதிர்க்கட்சிகள்

கூண்டோடு வெளியேற்றம்'

போன்றே அன்றாட செய்திகளில்

ஒன்றாகி விட்டன

நந்திகிராம படுகொலைகளும்.

எங்கள் கவலை
அரசி சாக கிடக்கிறாள்

அபியோ கோமாவில் இருக்கிறாள்

அஞ்சலி வேறு சிறையில் இருக்கிறாள்

எங்களுக்கு இப்படி ஆயிரம் கவலைகள்

யாருக்கய்யா நேரமிருக்கிறது

நந்திகிராமம் பற்றியெல்லாம் கவலைப்பட.

சிவப்பு கம்பளம்

சிவப்பு கொடி மாறியது

சிவப்பு கம்பளமாக

பெரு முதலாளிகளுக்கு.

உயிர்

2007-11-16T07:05:00.000-08:00

முத்தத்தின் நிறைகுடம்

2007-11-10T07:44:00.001-08:00

நான்கு இதழ்கள் எழுதும் நவரச கவிதை முத்தம்.முத்தத்தை மையமாக வைத்து கவிதைச் சிற்பம் செதுக்கியிருக்கிறார் கவிஞர் ஜெ.நம்பிராஜன்.கவிதையை வாசிக்கும் பொழுது மனம் காதலின் உருகுநிலைக்கும் உறைநிலைக்கு சென்று திரும்புகிறது.முத்தத்தின் வாசனை உயிரின் மூலை முடுக்கெல்லாம் பரவுகிறது.கவித்துவ வாசனை மனதை ஆக்கிரமிக்கிறது.சத்தமில்லாமல் யுத்தம் செய்கிறது முத்தத்தின் நிறைகுடம் எனும் இக்கவிதைத் தொகுப்பு.
-வித்தக கவிஞர் பா.விஜய்

வித்தக கவிஞர் ரசித்த சில கவிதைகள்

உன் மேல் உதடு சூரியன்...

கீழ் உதடு சந்திரன்.

ஒரே முத்தத்தில்

உருக வைக்கும் வெயிலையும்

உறைய வைக்கும் பனியையும்

என் மேல் செலுத்துகிறாய்.

நீ விவசாயி

நான் விளைநிலம்

என்னுள் மோகத்தை விதைத்து

முத்தத்தை அறுவடை செய்கிறாய்.

உன் ஒவ்வொரு முத்தமும்

ஓர் முள்

அதை...

மறு முத்தத்தால் தான்

எடுக்க வேண்டும்.

உன் இதழ் தேனடை

அதில் தேனெடுக்கும் போது மட்டுமே

தேனீக்கள் கொட்டுவதில்லை.

எத்தனை முறை குடித்தாலும்

தீராத மதுப்புட்டி

உன் இதழ்

எவ்வளவு குடித்தாலும்

ஆசை அடங்காத பெருங்குடிகாரன்

நான்.

மேலும் தொடர்புக்கு